तो खरा असतो कवी

सोसण्याचा सूर करतो तो खरा असतो कवी;
देखणे जो दु:ख करतो तो खरा असतो कवी.

मौन ज्याचे बोलके अन् बोलताना मौन तो;
जो मुक्याचा शब्द होतो तो खरा असतो कवी.

क्रौंच मरतो,पाहताना जो स्वत: घायाळतो;
वेदनेचे वेद करतो तो खरा असतो कवी.

सत्य ज्याच्या जीवनाचे सार अन् आधारही;
शीव,सौंदर्यास जाणे तो खरा असतो कवी.

दंभ ज्याला साहवेना,बंड जो करतो सदा-
ज्ञानराया वा तुक्यासम;तो खरा असतो कवी.

जीव पायी अंथरोनी नम्रता सांभाळतो,
आढ्यतेला जाळतो जो;तो खरा असतो कवी.

तापतो,संतापतो पण शांतही तो राहतो;
गारवा देतो जगाला तो खरा असतो कवी.

शब्द होती शास्त्र ज्याचे,शब्द होतो अस्त्रही;
जो शिवी-ओवीस गातो तो खरा असतो कवी.

निर्मितीचा ध्यास ज्याला,सुंदराचा श्वास तो;
इश्वराचे रूप दुसरे तो खरा असतो कवी.

- कमलाकर देसले
९४२१५०७४३४